Skip to main content

ఇమ్రాన్ ఇండియాను ఎందుకు పొగిడాడు?

పాపం.. పాక్ లో ఇమ్రాన్ పరిస్థితి పైనే ఇప్పుడంతా చర్చించుకుంటున్నారు. తాను గెలిచి దేశాన్ని ఓడించాడా? లేక తాను ఓడి దేశాన్ని గెలిపిస్తున్నాడా? ఈ చిక్కు ప్రశ్నలకు మూలాలెక్కడున్నాయో మనకే కాదు.. ఇమ్రాన్ కి కూడా అర్థం కావడం లేదు. అలాగే ఇండియా మీద ప్రశంసలు ఆయనకు కలిగిన జ్ఞానోదయాన్ని సూచిస్తున్నాయా.. లేక పాము చచ్చినా పగ మాత్రం చావదన్న జాతి నైజాన్ని సూచిస్తున్నాయా.. అన్న అనుమానాలు కలుగుతున్నాయి.

భారత రాజకీయాలపై పాకిస్తాన్ కు ఆసక్తి ఉన్నట్టే.. పాక్ రాజకీయాలపై కూడా భారత ప్రజల్లో ఆసక్తి ఉంటుంది. పాక్ ను పక్కలో బల్లెంలా సగటు భారతీయుడు ఎలా భావిస్తాడో.. భారత్ ను డిస్టర్బ్ చేయాలన్న దుర్బుద్ధి అక్కడి ఎక్కువ మంది పౌరుల్లో ఉంటుంది. దీనిక్కారణమేంటో అందరికీ తెలిసిందే. ద్విజాతి సిద్ధాంతం మీద దేశాన్ని బలవంతంగా విడగొట్టారన్న ఫీలింగ్ భారతీయుల్లో బలంగా పాతుకుపోయి ఉండడమే. అటు వాళ్లూ అంతే. ఇండియాను వాళ్లు ఏనాడూ పొరుగుదేశంగా చూడలేదు. ఇండియాతో శాశ్వత జాతివైరమే వారి దృష్టిలో శాశ్వతమైన ఎజెండా. కాబట్టి ఈ రెండు పొరుగు దేశాల వ్యవహారాల్లో శత్రుబద్ధమైన వైఖరి అలా దశాబ్దాలుగా కొనసాగుతూ వస్తోంది. ఇమ్రాన్ కూడా అందుకు మినహాయింపేమీ కాదు. అయితే ఇమ్రాన్ ప్రధాని పదవి త్రిశంకుస్వర్గంలో కొట్టుమిట్టాడుతున్న పరిస్థితుల్లో ఆయన భారత్ గురించి కొన్ని కఠోరమైన వాస్తవాలు మాట్లాడాడు. ఆ వాస్తవాలు ఆయనకు, ఆయనలాగే కోట్లాది పాక్ పౌరులకు జీర్ణం కానివే అయినా.. మాట్లాడాడు. 

ఇండియాను ఏ సూపర్ పవర్ కంట్రీ కూడా డిక్టేట్ చేయలేదని... బుల్లెట్ పాయింట్ లాగా ఇండియా గురించి ఒక్క మాటలో చెప్పేశాడు. ఒకరి శక్తి సామర్థ్యాలేంటో వాళ్ల కన్నా వాళ్ల శత్రువులకే బాగా తెలుస్తాయన్నది ఇమ్రాన్ మాటలు రుజువు చేశాయి. అగ్రరాజ్యం అమెరికా కూడా ఇండియాను శాసించజాలదని ఇమ్రాన్ రూఢిగా అర్థం చేసుకున్నాడు. మొన్నటికి మొన్న రష్యా విదేశాంగ మంత్రి  సెర్గీ లావ్రోవ్ భారత్ లో పర్యటించినప్పుడు ఇండియా ఏది కోరితే అది ఇస్తామని బాహాటంగా డిక్లేర్ చేశాడు. ఇండియాతో స్నేహానికి ఎంత దూరమైనా వెళ్తామన్నాడు. ముందుగా జైశంకర్ ను కలిసి.. అంతర్జాతీయ అంశాలపై భారత వైఖరి ఎలా ఉంటుందో తెలుసుకున్నాక.. ప్రధాని మోడీని కలిశాడు లావ్రోవ్. ఆ తరువాత ప్రెస్ కు పూర్తి క్లారిటీ ఇచ్చాడు. భారత్ పట్ల సంపూర్ణమైన విశ్వాసాన్ని ప్రకటించాడు. భారత్-రష్యా స్నేహబంధం బరాబర్ గా ఉండి తీరుతుందని అగ్రరాజ్యాన్ని ఉడికించాడు. అటు అమెరికా కూడా రష్యాతో భారత వైఖరిని మింగలేక, కక్కలేక.. ఏమనాలో తెలియక పిల్లిమొగ్గలేసింది. అంతకుమించి ముందుకెళ్తే ఆంక్షలు ఎదుర్కోవాల్సి వస్తుందని మేకపోతు గాంభీర్యం ప్రకటించింది. ఆంక్షల గురించి మాట్లాడకపోతే బాగుండదు కాబట్టి... రిక్వెస్టు లాంటి హెచ్చరికను జారీ చేసింది. అయితే అమెరికా హెచ్చరికను భారత్ ఏమాత్రం ఖాతరు చేయలేదు. మరి.. భారత్ కో ఇత్ నా హిమ్మత్ కహా సే ఆయీ? ఇండియాలో ప్రతిపక్ష పార్టీలకు అర్థం కాకపోవచ్చు గానీ.. ఇమ్రాన్ కు మాత్రం సెంట్ పర్సెంట్ తలకెక్కింది.

అది ఒక పార్శ్వమైతే.. ప్రపంచానికి అర్థమైన రెండో పార్శ్వం మరోటి ఉంది. రష్యా భారత్ మీద ఎంత నమ్మకాన్ని కనబరచిందో అంతే నమ్మకాన్ని, ఇంకా చెప్పాలంటే అంతకంటే ఎక్కువ నమ్మకాన్నే ఉక్రెయిన్ వ్యక్తం చేసింది. భారత్ తల్చుకుంటే యుద్ధం ఆగుతుందని జెలెన్ స్కీ ఓపెన్ గా విజ్ఞప్తి చేయడం.. మనమేంటో ప్రపంచానికి చాటినట్లయింది. ప్రపంచంలో ఉన్న ఏ అగ్రరాజ్యం మీద కూడా పెట్టుకోని భరోసా.. ఉక్రెయిన్ మన మీదనే పెట్టుకుంది. అందుక్కారణం ఒక్కటే. అగ్రరాజ్యాలైనా, అథో రాజ్యాలైనా.. ఇతరుల అవసరాలపై అవకాశాలు వెదుక్కుంటాయి. సింపుల్ గా చెప్పాలంటే వ్యాపారాలు చేస్తాయి. తమ వ్యాపారానికి పనికొస్తే చేయూతనిస్తాయి... లేదంటే తొక్కేస్తాయి. అమెరికా చేస్తున్నది ఇదే కదా. కానీ భారత్ అలా ఎప్పుడూ చేయలేదు. ఎవరితోనూ చేయలేదు. భారత్ ఎలాంటిదో ప్రపంచం ముందు తెరిచిన పుస్తకమే. అమెరికా అందుకు భిన్నం. దాని లోగుట్లు ఒక్కొక్కటిగా ప్రపంచానికి తెలిసిపోతున్నాయి. మొన్న ఆఫ్ఘన్లో అమెరికా ఏం చేసిందో ప్రపంచమంతా చూసింది. తన గాలి తానే తీసేసుకుంది అమెరికా. అలాంటి అమెరికా భారత్ తో జరిగే వ్యాపారాన్ని కాలదన్నుకుంటుందా? వరదన పోయే వ్యాపారి ఊరికే పోడన్న సామెతలాగా ఎవరూ నమ్మలేకుండా తయారైంది అమెరికా పరిస్థితి. అయినా అమెరికాను ఎదిరించాలంటే గట్స్ కావాలి. ఆ గట్స్ ను ఇప్పుడు ఇండియా పుష్కలంగా సముపార్జించుకుంది. ఈ తత్వం ఇమ్రాన్ కు సెంట్ పర్సెంట్ బోధపడింది. అందుకే పాకిస్తాన్ లోని రాజకీయ పార్టీలు ఇండియాను చూసి నేర్చుకోండ్రా.. అంటూ ప్రధాని హోదాలో చివరిమాటగా చెప్పాడు. ఎందుకంటే ప్రధానిగా మాట్లాడే అవకాశం మళ్లీ రాదన్న విషయం ఆయనకు తెలుసు. పాక్ ప్రజల కోసం తానెంత కష్టపడ్డాడో.. ఆర్థికంగా నిలబెట్టడానికి ఎంత ట్రై చేశాడో.. అవన్నీ బూడిదలో పోసిన పన్నీరులాగా మార్చేశారని, అందుకు పాకిస్తాన్ భారీ మూల్యం చెల్లించుకోక తప్పదని చివరి వార్నింగ్ ఇచ్చాడు. ఎవరో వచ్చి మీ దేశాన్ని బాగు చేయరు. మీకై మీరే ముందుకు రావాలి. వీధుల్లోకి రావాలి. నాతో కలిసి పోరాడాలి. నీను మీతో పాటే ఉంటాను. ఎక్కడికీ పారిపోను. దేశ పరిస్థితి ఇంకా దిగజారిపోక ముందే ఎంతో భవితవ్యం ఉన్న దేశ యువతరం అడ్డదార్లు తొక్కకుండా ఉండాలంటే.. ఎన్నికైన ప్రజాప్రతినిధులు అంగట్లో పశువుల్లాగా అమ్ముడు పోకుండా ఉండాలంటే.. రండి.. శాంతియుతంగా పోరాడదాం.. అంటూ ఆఖరి అస్త్రం వదిలాడు. 

ప్రధాని హోదాలో ఇమ్రాన్ పోతూపోతూ చెప్పిన ఆఖరు మాటలు.. పాక్ చరిత్రలో నమోదు కావాలన్నదే ఆయన ఉద్దేశం అయి ఉండవచ్చు. దేశంలో రాజ్యమేలుతున్న అరాచకం, దేశాన్ని తేరుకోలేనంతగా ముంచేస్తున్న అవినీతి, ఆశ్రితపక్షపాతం, సైన్యం జోక్యం, అమెరికా వేసే ఎత్తులకు పావులుగా మారుతున్న ప్రతిపక్షాలు, స్వపక్షంలోని తిరుగుబాటుదార్లు, చివరిగా ప్రజలు.. ఇలా దేశంలో ఏం జరుగుతుందో.. అందరూ ఆలోచించాలని చెప్పాడు. మరి.. ఇమ్రాన్ కు అంత తెలివే ఉంటే... ఇంత మంచి ఇండియాతో వైరాన్ని కాక శత్రుత్వాన్ని ఎందుకు పెంచుకున్నాడు? పాక్ సైన్యం చెప్పినట్టల్లా ఎందుకు ఆడాడు? దశాబ్దాల శత్రుత్వాన్ని తుడిచేసుకొని కొత్త అధ్యాయం లిఖిద్దామని ఎందుకు భావించలేదు? కాశ్మీర్ ఇష్యూను ఎందుకు కెలికాడు? మనకు వ్యతిరేకమైన చైనాతో ఎందుకు చెట్టపట్టాలేసుకున్నాడు? ఈ తెలివి పదవి ఊడిపోతున్నప్పుడే రావాలా? శ్మశాన వైరాగ్యంలాగా ఈ మాటలు ఇప్పుడు చెప్పడం కన్నా.. అధికారంలో ఉన్నప్పుడే అమలు చేయవద్దని ఎవరైనా ఆపారా? ఇమ్రాన్ కైనా, రేపొచ్చే అతని బాబులకైనా పుర్రెలో బుద్ధి ఉండాలి కదా. ఉండాలని ఆశిద్దాం. 

Comments

Popular posts from this blog

కొత్త పన్నులు రాబోతున్నాయి

వివిధ వస్తువులపై కేంద్ర, రాష్ట్ర ప్రభుత్వాలు వసూలు చేసే పన్నుల్లో భారీ మార్పులు చోటు చేసుకోబోతున్నాయా? ప్రతి నిత్యం వాడే వస్తువులపై పన్నులు పెరగక తప్పదా? ఇప్పటికే పెరిగిన ధరలతో సామాన్యుడు అల్లాడుతుంటే మళ్లీ కొత్త పన్నులతో బాదడం దేనికి.. అన్న అనుమానం కలుగుతుంది కదా?  మొన్ననే కేంద్ర ప్రభుత్వ బడ్జెట్ చూశాం. ఇక్కడ కేసీఆర్, అక్కడ జగన్ సర్కార్ల బడ్జెట్లు కూడా చూశాం. ఎవరూ పన్నుల జోలికి పోలేదు. దీంతో ప్రజలందరూ ఎంతోకొంత రిలీఫ్ ఫీలయ్యారు. ప్రభుత్వాలు పన్నుల జోలికి పోలేదు.. బతుకు జీవుడా అనుకున్నారు. అయితే ఆ ఆనందం ఎంతో కాలం నిలిచే అవకాశం కనిపించడం లేదు. ఎందుకంటే ఆదాయం తగ్గిపోయి అల్లాడుతూ అప్పులతో నెట్టుకొస్తున్న రాష్ట్రాలు కొత్త ఆదాయ మార్గాల కోసం అన్వేషిస్తున్నాయి. వచ్చే నెలలో జరగబోయే జీఎస్టీ కౌన్సిల్ సమావేశంలో కొత్త పన్నుల ప్రతిపాదనలు తెరమీదికు రాబోతున్నాయి.  మోడీ సర్కారు అధికారంలోకి వచ్చాక 2017 నుంచి గూడ్స్ అండ్ సర్విసెస్ ట్యాక్స్.. జీఎస్టీ ని అమల్లోకి తీసుకొచ్చింది. దాని ప్రకారం దేశమంతా ఒక వస్తువుకు ఒకే రకమైన పన్ను విధానం అమల్లోకి వచ్చింది. అయితే ఇందులో ఆయా రాష్ట్ర ప్రభుత్వాలకు నష్టం వాటిల్లుతో

"రామప్ప గుడి యాత్ర"కు అనూహ్య స్పందన

తాము తలపెట్టిన రామప్ప గుడి యాత్రకు అనూహ్యమైన స్పందన లభించిందని, ఈ స్ఫూర్తిని కొనసాగిస్తూ రానున్న రోజుల్లో తెలంగాణ నుంచే కాక, ఆంధ్రప్రదేశ్ నుంచి కూడా మరిన్ని  యాత్రలు  నిర్వహిస్తామని మంగళంపల్లి మహామాయి దేవాలయ అభివృద్ధి కమిటీ ప్రతినిధి బొడ్డుపల్లి  బాలబ్రహ్మాచారి పేర్కొన్నారు.  ప్రపంచ దేశాల్లో భారతీయ శిల్పకళకు, శిల్పాచార్యుల   ప్రతిభా పాటవాలకు అజరామరమైన కీర్తిని సంపాదించిన  రామప్ప దేవాలయ   చరిత్రను ప్రజలకు మరింత చేరువ చేసేందుకు జనవరి ఒకటో తేదీన తాము ఈ   యాత్రను తలపెట్టామని, అయితే ఈ యాత్రకు తాము అనుకున్నదానికన్నా ప్రజల నుంచి ఎక్కువ స్పందన వచ్చిందని, ఆ ఉత్సాహంతో మరిన్ని మెరుగైన ఏర్పాట్లు చేసి ఎక్కువ మంది ప్రజలను భాగస్వామ్యం చేస్తామని, మరిన్ని యాత్రలు చేపడతామని చెప్పారు.  రామప్ప అనే శిల్పాచార్యుడి పేరుతో శతాబ్దాలుగా ప్రజలందరికీ సుపరిచతమైన అద్భుతమైన  ఆలయం ప్రపంచ వారసత్వ కట్టడంగా గుర్తింపు పొందిన తరువాత రామప్ప అనే పేరును క్రమంగా  అదృశ్యం చేసే కుట్ర జరుగుతోందని, అందులో భాగంగానే యునెస్కో ధ్రువీకరించిన శాసనంలో రామప్ప గుడి అనే పేరును బ్రాకెట్లో పెట్టి రుద్రేశ్వరాలయాన్ని ప్రధానంగా తెరమీదికి ఎక

'తానా' కవి సమ్మేళనానికి ఎంపికైన జె.వి.కుమార్ చేపూరి

తానా ప్రపంచ సాహిత్య వేదిక "భారతదేశ వజ్రోత్సవాలు"  పురస్కరించుకుని పలు సామాజిక అంశాలపై ప్రతిష్టాత్మకంగా "అంతర్జాతీయ కవితల పోటీలు" నిర్వహించింది. ఈ పోటీలో హైదరాబాద్ కు చెందిన కవి, రచయిత జె.వి. కుమార్ చేపూరి ఎంపికయ్యారు. ఈ నెల 24న (2022 ఏప్రిల్ 24) తానా ప్రపంచవ్యాప్తంగా ఆన్ లైన్ లో నిర్వహిస్తున్న “కవితాలహరి”లో జెవి కుమార్ చేపూరి తన కవితను ఆవిష్కరించబోతున్నారు. “భారతదేశ సమగ్రత”  అనే ఇతివృత్తంపై జెవి కుమార్ ఇదివరకే సమర్పించిన "సర్వమత సారం - మానవత్వం" అనే వచన కవిత ఈ పోటీకి ఎంపికైంది.  Also Read:  కొత్త సెక్రటేరియట్ ఓపెనింగ్ ఎప్పుడో తెలుసా? ప్రపంచవ్యాప్తంగా ఆన్ లైన్ వీడియో వేదికగా జరిగే ఈ కవితావిష్కరణ సభలో పాల్గొనే అవకాశం కల్పించినందుకు తానా అధ్యక్షులు లావు అంజయ్య చౌదరికి, తానా ప్రపంచ సాహిత్య వేదిక సమన్వయకర్త చిగురుమళ్ళ శ్రీనివాసుకు, ప్రపంచ సాహిత్య వేదిక నిర్వాహకులు డా. ప్రసాద్ తోటకూరకు జె.వి.కుమార్ కృతజ్జలు తెలియజేశారు. అనేక మంది దేశ, విదేశ తెలుగు కవులు, సాహితీవేత్తలు హాజరయ్యే ఈ కవితాలహారి కార్యక్రమం తానా అధికారిక యూ-ట్యూబ్ ఛానెల్, ముఖపుస్తకం (ఫేస్ బుక్) ఛానల్ ల