ఒక కులాన్ని మాయం చేసిన తెలంగాణ సర్కారు

(విశ్వబ్రాహ్మణ శిల్పాచార్యులు నిర్మించిన రామప్ప ఆలయం)

ప్రభుత్వాలు తలుచుకుంటే దేన్నయినా మాయం చేస్తాయా? అనేక ప్రజా సమూహాలు అనాదిగా తమ ఉనికిని, ఆత్మగౌరవాన్ని చాటుకుంటూ వస్తున్న కులాన్ని కూడా ప్రభుత్వాలు మాయం చేయగలవా? అన్న సందేహాలు తాజాగా వ్యక్తమవుతున్నాయి. ఇప్పుడు తెలంగాణలో ఇదే జరుగుతుందని.. తమ ఉనికిని పూర్తిగా భూస్థాపితం చేస్తున్నట్టుగా ముఖ్యమంత్రి రేవంత్ రెడ్డి సర్కారు వ్యవహరిస్తోందని రాష్ట్రంలోని విశ్వబ్రాహ్మణ కుల సంఘాలు, యువతరం ఆవేదన చెందుతున్నారు. 

నవంబర్ 6న మొదలైన బీసీ కులగణలో అనాదిగా వస్తున్న విశ్వబ్రాహ్మణ కులాన్ని విస్మరించారన్న విమర్శలు తీవ్రంగా వ్యక్తమవుతున్నాయి. విశ్వబ్రాహ్మణులు కమ్మరి, వడ్రంగి, కంచరి, శిల్పి, అవుసుల వంటి పేర్లే గాక.. వడ్ల, కంసాలి వంటి ఇతర పేర్ల వృత్తిపనులు చేసుకుంటూ సమాజంలో గౌరవ ప్రదంగా జీవిస్తున్నారు. వీరిలో పౌరోహిత్యం చేసేవారు కూడా పెద్ద సంఖ్యలో ఉన్నారు. వీరి వృత్తుల ఆధారంగానే గ్రామ వికాసం, దేవీ దేవతలు, గుళ్లూ, గోపురాలు ఏర్పడ్డాయి. కేవలం విశ్వబ్రాహ్మణ శిల్పాచార్యుల వల్లే భారతదేశ టూరిజం ఉనికి చాటుకుంటోంది అంటే అతిశయోక్తి కాదు. ఆయా రాష్ట్ర ప్రభుత్వాలకైనా, కేంద్రానికైనా అధిక ఆదాయం సమకూరుస్తున్నది ప్రాచీన ఆలయాల వంటి వారసత్వ సంపదేనని వేరే చెప్పాల్సిన అవసరం లేదు. అలాంటి విశ్వబ్రాహ్మణుల కుల నామాన్ని రేవంత్ సర్కారు పూర్తిగా విస్మరించిందన్న ఆగ్రహం తీవ్ర స్థాయిలో వ్యక్తమవుతోంది. 

అయితే ఈ తప్పిదాన్ని తాము ఆలస్యంగా గుర్తించామని.. అయినప్పటికీ ప్రభుత్వం ఈ విషయంలో పూనుకొని తక్షణమే సవరించాలని విజ్ఞప్తి చేస్తున్నారు. విశ్వబ్రాహ్మణ లేదా విశ్వకర్మ అనే పాత పేరును కచ్చితంగా పొందు పరచాలని ఒకవేళ అలా చేయకపోతే.. కులగణనను బహిష్కరించాలని.. జరిగిన పొరపాటును ప్రభుత్వం దృష్టికి తీసుకెళ్లాలని ఆ వర్గంలోని మేధావులు, కుల సంఘాల నాయకులు పిలుపునిస్తున్నారు.