Skip to main content

ఒవైసీ బ్రదర్స్ తో స్నేహం కేసీఆర్ కు సవాలేనా?

రాజకీయాల్లో ఒకరి నిర్లక్ష్యమే ఇంకొకరికి అవకాశంగా మారుతుంది. అవతలి వ్యక్తి అతి విశ్వాసమే ఇవతలి వ్యక్తికి ఆయుధం అవుతుంది. సంఖ్యాబలంతోనే సర్వత్రా నెగ్గుకొస్తానంటే కుదరదు. ప్రజల్లో పాదుకున్న సెంటిమెంట్లేంటో అర్థం చేసుకొని అడుగేయాలి. అలా కాకపోతే విపక్షం చేతిలోనే పరాభవం చవి చూడక తప్పదు. తెలంగాణలో వికసించేందుకు బీజేపీ శక్తినంతా ప్రయోగిస్తున్న సమయంలో... కేసీఆర్ విస్మరిస్తున్న కీలకమైన అంశాలేంటో చెప్పడమే ఈ ఆర్టికల్ ఉద్దేశం. 



తెలంగాణలో బీజేపీ బలపడేందుకు ....స్వయంగా కేసీఆరే ఛాన్స్‌ ఇస్తున్నారా? కేసీఆర్ నిర్లక్ష్య వైఖరిని ఓట్ల రూపంలోకి మార్చుకునేందుకు బీజేపీ ఇప్పటికే స్కెచ్ రెడీ చేసిందా? మిత్రపక్షమైన ఎంఐఎం ఏం మాట్లాడినా కేసీఆర్ ఎందుకు రియాక్ట్ అవ్వడం లేదు? తెలంగాణలో మతసామరస్యానికి ముప్పు వాటిల్లిందా? అక్బరుద్దీన్ హేట్ స్పీచ్‌పై టీఆర్ఎస్‌ వైఖరేంటి? మత విద్వేషాలను రెచ్చగొట్టేలా అక్బర్ చేసిన కామెంట్స్ ను కేసీఆర్ ఉపేక్షిస్తే...జరిగే పరిణామాలేంటి? 


తెలంగాణ అంటే గంగా జమునా తెహజీబ్...కేసీఆర్ ఎక్కడ సభ పెట్టినా చెప్పే మాట ఇది. నిజానికి మిగిలిన రాష్ట్రాలతో పోలిస్తే...తెలంగాణలో మతసామరస్యం చాలా ఎక్కువ. ఇది చాలా సార్లు నిరూపితమైంది కూడా. తెలంగాణ ప్రత్యేక రాష్ట్రంగా ఏర్పాటైన తర్వాత కేసీఆర్ కూడా ఈ పాలసీ చెడిపోకుండా...మతపరమైన విషయాల్లో రాజకీయాలకు తావు లేకుండా నిర్ణయాలు తీసుకున్నారు. కానీ ఇదంతా మూడేళ్ల క్రితం వరకు మాట. ఆ తర్వాత చాలా మార్పులు జరిగాయి. అప్పట్లో ప్రభుత్వాన్ని కూల్చేందుకు జరిగిన కుట్రను అసదుద్దీన్ బయట పెట్టినప్పటి నుంచి ఎంఐఎం పార్టీ టీఆర్ఎస్‌కు మిత్రపక్షంగా మారిపోయింది. వారు వ్యక్తిగతంగా కూడా ఆత్మీయ స్నేహితులుగా ఒక్కటయ్యారు. అటు కేంద్రంలో అధికారంలో ఉన్న బీజేపీతో కూడా కేసీఆర్ మంచి సంబంధాలే నెరుపుతూ వచ్చారు. కానీ ఎంఐఎంను చేరదీయడం బీజేపీకి నచ్చలేదు. ఈ విషయాన్ని బీజేపీ నేతలు పలుమార్లు బహిరంగంగానే చెప్పారు.


ప్రస్తుతం ఎంఐఎం నేత అక్బరుద్దీన్ ఓవైసీ హేట్ స్పీచ్‌తో కేసీఆర్ వైఖరిపై మరోసారి చర్చ మొదలైంది. అక్బరుద్దీన్ చేసిన వ్యాఖ్యలపై నేరుగా కేసీఆర్ కాకపోయినా...కనీసం ఆ పార్టీ నేతల నుంచి కూడా ఒక్క ఖండనా రాలేదు. పైగా అక్బరుద్దీన్ చేసిన వ్యాఖ్యలు వివాదాస్పదమా? కాదా? అన్న మీమాంస కూడా అవసరం లేదు. అక్బర్ వ్యాఖ్యలను ఎవరూ హర్షించరు. ఇంత జరిగినా ప్రభుత్వం నుంచి రియాక్షనే లేదు. బీజేపీ మాత్రం తమ పాలసీ ప్రకారం ఎంఐఎంపై ఎదురుదాడి ప్రారంభించింది. కానీ ఇన్నాళ్లూ ఎంఐఎంకు బీజేపీకి నడిచిన మాటల యుద్ధం వేరు, ఇప్పుడు జరుగుతున్నది వేరు. ఇప్పుడు కేసీఆర్ అధికారంలో ఉన్నారు. పైగా ఎంఐఎం ఆ పార్టీకి మిత్రపక్షం కూాడా. 


అక్బరుద్దీన్ దూకుడుకు ఆదిలోనే కళ్లెం వేయాల్సింది


అక్బరుద్దీన్ ఇలాంటి వ్యాఖ్యలు చేయడం తొలిసారేం కాదు. 2013లో కూడా నిజామాబాద్‌లో సేమ్ ఇలాంటి వ్యాఖ్యలే చేశారు. అప్పుడు కిరణ్ కుమార్‌ రెడ్డి అధికారంలో ఉన్నారు. నాడు అక్బర్‌పై చర్యలు తీసుకున్నారు. కానీ కేసీఆర్ మాత్రం ఉలుకూ పలుకూ లేకుండా ఉండిపోయారు. దాంతో కేసీఆర్‌పై ప్రజల్లో నెగిటివ్ సంకేతాలు వెళ్తున్నాయి. ముఖ్యంగా హిందువుల్లో కేసీఆర్‌పై ఒక అభిప్రాయం ఏర్పడే ప్రమాదం ఉంది. ఇప్పటికే నిజామాబాద్, కరీంనగర్ పార్లమెంట్ స్థానాలను కోల్పోయేందుకు ఎన్నికల సమయంలో కేసీఆర్ హిందువులపై చేసిన వివాదాస్పద వ్యాఖ్యలు కూడా ఒక కారణమని విశ్లేషకులు భావిస్తున్నారు. అంత డ్యామేజ్ జరిగిన తర్వాత కూడా కేసీఆర్ తేరుకోకపోవడం సరికాదంటున్నారు నిపుణులు. 


ఇక్కడ మరో విషయాన్ని కూడా రాజకీయ పండితులు ఉటంకిస్తున్నారు. శ్రీరాముడిపై అనుచిత వ్యాఖ్యలు చేశారని కత్తిమహేష్‌ను నగర బహిష్కరణ చేశారు. ఆ తర్వాత పరిపూర్ణానందను కూడా విద్వేషాలను రెచ్చగొడుతున్నారనే ఆరోపణలతో బహిష్కరించారు. ఆ సమయంలో కేసీఆర్ సర్కారు నిర్ణయాన్ని పలువురు స్వాగతించారు. మత విద్వేషాలను రెచ్చగొట్టే ఎవరినైనా ఉపేక్షించేది లేదన్న సర్కారు వైఖరిని అభినందించారు. కానీ ఇప్పుడు అక్బరుద్దీన్ విషయంలో ఎందుకు సైలెంట్‌ అయిపోయారని సామాన్యుల నుంచి ప్రశ్నలు వస్తున్నాయి. ఇలా ఉదాసీన వైఖరితో ఉంటే బీజేపీకి ఛాన్స్ ఇచ్చిన వారవుతారని టీఆర్ఎస్‌ నేతలను హెచ్చరిస్తున్నారు.


కేసీఆర్ ఏం చేస్తారు? 


హిందుత్వంతో పాటు జాతీయవాదాలే ఎజెండాగా వెళ్తున్న బీజేపీకి...కేసీఆర్ చేసే ఇలాంటి చిన్న చిన్న నిర్లక్ష్యాలు ఛాన్స్ ఇస్తాయని విశ్లేషకులు అంటున్నారు. తెలంగాణలో ఇప్పటి వరకైతే మతపరమైన భావోద్వేగాలు పనిచేసే స్థితి లేకపోయినప్పటికీ...క్రమంగా ఆ పరిస్థితిని తీసుకొస్తే ముప్పు తప్పదంటున్నారు. అక్బర్ వ్యాఖ్యలపై కేసీఆర్ సర్కారు తన వైఖరిని ప్రకటించకపోయినప్పటికీ....కనీసం ఇప్పటికైనా చట్టపరంగా చర్యలు తీసుకుంటే బాగుంటుందన్న అభిప్రాయాలు వినిపిస్తున్నాయి. మరి రానున్న ప్రమాదాన్ని కేసీఆర్ గ్రహిస్తారా? గ్రహించి, తేరుకొని దిద్దుబాటు చర్యలు తీసుకుంటారా? లేక ముస్లింలు అందరూ ఎంఐఎం వెంటే ఉన్నారని భ్రమించి, ఒవైసీ సోదరుల కోసం రాజకీయ, సామాజిక వాతావరణాన్ని చేజేతులా కలుషితం చేస్తారా? చూడాలి మరి. 


- టి.రమేశ్ బాబు


Mail ID: rameshbabut@hotmail.com


 


 


 


Comments

Popular posts from this blog

కొత్త పన్నులు రాబోతున్నాయి

వివిధ వస్తువులపై కేంద్ర, రాష్ట్ర ప్రభుత్వాలు వసూలు చేసే పన్నుల్లో భారీ మార్పులు చోటు చేసుకోబోతున్నాయా? ప్రతి నిత్యం వాడే వస్తువులపై పన్నులు పెరగక తప్పదా? ఇప్పటికే పెరిగిన ధరలతో సామాన్యుడు అల్లాడుతుంటే మళ్లీ కొత్త పన్నులతో బాదడం దేనికి.. అన్న అనుమానం కలుగుతుంది కదా?  మొన్ననే కేంద్ర ప్రభుత్వ బడ్జెట్ చూశాం. ఇక్కడ కేసీఆర్, అక్కడ జగన్ సర్కార్ల బడ్జెట్లు కూడా చూశాం. ఎవరూ పన్నుల జోలికి పోలేదు. దీంతో ప్రజలందరూ ఎంతోకొంత రిలీఫ్ ఫీలయ్యారు. ప్రభుత్వాలు పన్నుల జోలికి పోలేదు.. బతుకు జీవుడా అనుకున్నారు. అయితే ఆ ఆనందం ఎంతో కాలం నిలిచే అవకాశం కనిపించడం లేదు. ఎందుకంటే ఆదాయం తగ్గిపోయి అల్లాడుతూ అప్పులతో నెట్టుకొస్తున్న రాష్ట్రాలు కొత్త ఆదాయ మార్గాల కోసం అన్వేషిస్తున్నాయి. వచ్చే నెలలో జరగబోయే జీఎస్టీ కౌన్సిల్ సమావేశంలో కొత్త పన్నుల ప్రతిపాదనలు తెరమీదికు రాబోతున్నాయి.  మోడీ సర్కారు అధికారంలోకి వచ్చాక 2017 నుంచి గూడ్స్ అండ్ సర్విసెస్ ట్యాక్స్.. జీఎస్టీ ని అమల్లోకి తీసుకొచ్చింది. దాని ప్రకారం దేశమంతా ఒక వస్తువుకు ఒకే రకమైన పన్ను విధానం అమల్లోకి వచ్చింది. అయితే ఇందులో ఆయా రాష్ట్ర ప్రభుత్వాలకు నష్టం వాటిల్లుతో

శ్రీశైల క్షేత్రంలో ఫొటోలు తీయబడును

ఎంతో చారిత్రక వైభవం, ఆధ్యాత్మిక శోభ వెల్లివిరిసే శ్రీశైల క్షేత్రాన్ని దర్శించుకోవడానికి ప్రతి భక్తుడే గాక ప్రతి భారతీయుడు కూడా ఆసక్తి చూపుతాడంటే అతిశయోక్తి కాదు. అందుకే శ్రీశైల  మహా క్షేత్రానికి భక్తుల తాకిడి విపరీతంగా ఉంటుంది. ఆధ్యాత్మిక యాత్రలకే గాక అద్భుతమైన టూరిస్టు ప్రాంతంగా ఉండడంతో ఎప్పుడూ రద్దీగా ఉంటుంది. ఇక మహాశివరాత్రి లాంటి పర్వదినాల్లో అయితే శ్రీశైలానికి ఉండే తాకిడి మామూలుగా ఉండదు. అయితే అన్ని ప్రముఖ హిందూ దేవాలయాల్లో ఉన్నట్టుగానే శ్రీశైలంలో కూడా ఫొటోలు, వీడియోలు తీయరాదనే  నిబంధన  ఉంది. ఎవరైనా కెమెరాలతో, సెల్ ఫోన్లతో లోనికి ప్రవేశించడానికి వీల్లేదు. అలా చేస్తే వాటిని ఆలయ సిబ్బంది జప్తు కూడా చేస్తారు. భద్రతా కారణాల రీత్యా కూడా శ్రీశైలం విషయంలో ఉన్నతాధికారులు జాగ్రత్తలు తీసుకుంటారు. అయితే నిబంధనలు మాత్రం పేరుకే స్ట్రిక్టుగా ఉన్నాయి గానీ.. ఆచరణలో మాత్రం అంతా డొల్లేనంటున్నారు భక్తులు.  ఎందుకంటే శ్రైశైలంలో దలారీ ఆనంద్ ను సంప్రదిస్తే ఎవరైనా, ఎక్కడైనా ఫొటో తీసుకోవచ్చు. అడిగినంత మొత్తం చెల్లిస్తే అమ్మవారి సన్నిధిలోనైనా, అయ్యవారి సన్నిధిలోనైనా.. ఎక్కడైనా సరే క్యాష్ పడేస్తే ఫొటో క్లిక

వేయి పున్నముల వేదాధ్యాయి పెదపాటి

మహా మహోపాధ్యాయ, బహుభాషావేత్త, వేద వేదాంగవేత్త, రాష్ట్రపతి సన్మాన విభూషిత, శతాధిక గ్రంథకర్త, ప్రాచీన వాఙ్మయ వ్యాఖ్యత పెదపాటి నాగేశ్వరరావు సహస్ర పూర్ణ చంద్ర దర్శన మహోత్సవం చూడముచ్చటగా ముగిసింది. హైదరాబాద్ లో రెండు రోజుల పాటు జరిగిన పెదపాటి వేయి పున్నముల దర్శన మహోత్సవానికి తెలంగాణ మాజీ స్పీకర్, ఎమ్మెల్సీ మధుసూదనాచారి ముఖ్యఅతిథిగా హాజరయ్యారు. చివరి రోజు ఘట్టం చిక్కడపల్లిలోని త్యాగరాయ గానసభలో సంప్రదాయబద్ధంగా జరిగింది. 1941లో గుంటూరు జిల్లాలో జన్మించిన పెదపాటి.. ఆనాడు ఉన్న అనేక వ్యతిరేక పరిస్థితులను ఎదురీది.. భాషలో, వేదాధ్యయనంలో, శిల్పశాస్త్రంలో ఎంతో కృషి చేశారని మధుసూూదనచారి కొనియాడారు. ఈనాటి యువకులను చదివించడానికి, అన్ని అవసరాలూ సమకూర్చడానికి తల్లిదండ్రులు సిద్ధంగా ఉన్నా పిల్లలు మాత్రం ఓ లక్ష్యం అంటూ లేకుండా ఉన్నారని ఆవేదన చెందారు. అందుకు భిన్నంగా పెదపాటి నాగేశ్వరరావు.. అననుకూల పరిస్థితులను అధిగమించి మహా పండితుడై కేవలం విశ్వబ్రాహ్మణ కులస్తులు మాత్రమే గాక యావత్ తెలుగుజాతి గర్వించే స్థాయికి ఎదిగారన్నారు.  అలాంటి మహా పండితుడికి తగిన గుర్తింపు రాకపోవడం కాస్త చింతించాల్సిన విషయమేనని, అందుకు ఎవర